hosh mein aa zindagi tu ne ghalat samjha mujhe

hosh meñ aa zindagī tū ne ġhalat samjhā mujhe

de nahīñ saktī kisī manzil pe bhī dhokā mujhe

mere afsāne ko phir unvān meñ uljhā diyā

aap ne apnī taraf kyoñ dekh kar dekhā mujhe

aur to har tarah takmīl-e-parastish ho chukī

sirf apne sāmne karnā hai ik sajda mujhe

zindagī kī uljhaneñ ab bhī sulajh jaa.eñ tamām

ik zarā merā nafas gar chhoḌ de tanhā mujhe

yaad aa jaatī hai apne vaqt kī be-iḳhtiyār

jab nazar aatā hai koī vaqt kā maarā mujhe

Duub mar ai zindagī ye kyā tire hote hue

maut aa.ī hai batāne ke liye rastā mujhe

umr-e-rafta hai ye nā-mumkin tujhe āvāz duuñ

aaj tak tū ne palaT kar bhī kabhī dekhā mujhe

vaqt ke hamrāh maiñ duniyā se aage baḌh gayā

ai 'shifā' āvāz detī rah ga.ī duniyā mujhe

hosh mein aa zindagi tu ne ghalat samjha mujhe

de nahin sakti kisi manzil pe bhi dhoka mujhe

mere afsane ko phir unwan mein uljha diya

aap ne apni taraf kyon dekh kar dekha mujhe

aur to har tarah takmil-e-parastish ho chuki

sirf apne samne karna hai ek sajda mujhe

zindagi ki uljhanen ab bhi sulajh jaen tamam

ek zara mera nafas gar chhoD de tanha mujhe

yaad aa jati hai apne waqt ki be-iKHtiyar

jab nazar aata hai koi waqt ka mara mujhe

Dub mar ai zindagi ye kya tere hote hue

maut aai hai batane ke liye rasta mujhe

umr-e-rafta hai ye na-mumkin tujhe aawaz dun

aaj tak tu ne palaT kar bhi kabhi dekha mujhe

waqt ke hamrah main duniya se aage baDh gaya

ai 'shifa' aawaz deti rah gai duniya mujhe