hosh-o-KHirad ka rah-e-junun mein guzar nahin

hosh-o-ḳhirad kā rāh-e-junūñ meñ guzar nahīñ

yaañ bā-ḳhabar vo hai jise apnī ḳhabar nahīñ

kuchh izhdihām jalva se aatā nazar nahīñ

vo paas haiñ ki duur ye tujh ko ḳhabar nahīñ

josh-e-junūn-e-ishq kī takmīl ke liye

kyā kam hai ye ki aah meñ merī asar nahīñ

idrāk kar liyā hai vahāñ ishq ne tujhe

ehsās-e-vahm kā bhī jahāñ par guzar nahīñ

shabnam kā jazb chāhiye ḳhurshīd kā karam

parvāz-e-ishq munhasir-e-bāl-o-par nahīñ

duniyā-e-ishq meñ dil-e-nā-āshnā-e-ġham

aisī bhī ek shaam hai jis kī sahar nahīñ

rag rag dil-e-fasurda kī muddat se sard hai

ab ḳhāk-dān-e-ishq meñ koī sharar nahīñ

'vahshī' qadam qadam pe yahāñ sajda-rez ho

kū-e-harīm-e-yār hai ye rahguzar nahīñ

hosh-o-KHirad ka rah-e-junun mein guzar nahin

yan ba-KHabar wo hai jise apni KHabar nahin

kuchh izhdiham jalwa se aata nazar nahin

wo pas hain ki dur ye tujh ko KHabar nahin

josh-e-junun-e-ishq ki takmil ke liye

kya kam hai ye ki aah mein meri asar nahin

idrak kar liya hai wahan ishq ne tujhe

ehsas-e-wahm ka bhi jahan par guzar nahin

shabnam ka jazb chahiye KHurshid ka karam

parwaz-e-ishq munhasir-e-baal-o-par nahin

duniya-e-ishq mein dil-e-na-ashna-e-gham

aisi bhi ek sham hai jis ki sahar nahin

rag rag dil-e-fasurda ki muddat se sard hai

ab KHak-dan-e-ishq mein koi sharar nahin

'wahshi' qadam qadam pe yahan sajda-rez ho

ku-e-harim-e-yar hai ye rahguzar nahin