hosh-o-KHirad mein aag laga di KHirman-e-kaif-o-kam ko jalaya

hosh-o-ḳhirad meñ aag lagā dī ḳhirman-e-kaif-o-kam ko jalāyā

sho.ala bane aur siine se lipTe aap jale aur ham ko jalāyā

jis ko kaheñ ghar-phūñk tamāshā bas vo tamāshā aap ne dekhā

aap kī bijlī ḳhush hai ki us ne musht-e-ḳhas-e-ādam ko jalāyā

ġhair ko jhiḌkī ham pe ināyat ho ga.ī āḳhir jaan ko aafat

bazm-e-azal meñ tum ne bulā kar kis liye nā-mahram ko jalāyā

zindagī apnī yās-o-tamanna aag pe aag aur sho.ale pe sho.ala

dil ko hamāre ġham se jalā kar sho.ala-e-ruḳh se ġham ko jalāyā

kaisī jalan thī kaisī jalan hai jal chuke phir bhī jal nahīñ chukte

kaash koī yuuñ tum ko jalā de jaise ki tum ne ham ko jalāyā

aag hai bijlī aag haiñ zarre aag hai sūraj aag haiñ taare

ham ne na kī thī shoḳh-nigāhī aap ne kyoñ aalam ko jalāyā

hosh-o-KHirad mein aag laga di KHirman-e-kaif-o-kam ko jalaya

shoala bane aur sine se lipTe aap jale aur hum ko jalaya

jis ko kahen ghar-phunk tamasha bas wo tamasha aap ne dekha

aap ki bijli KHush hai ki us ne musht-e-KHas-e-adam ko jalaya

ghair ko jhiDki hum pe inayat ho gai aaKHir jaan ko aafat

bazm-e-azal mein tum ne bula kar kis liye na-mahram ko jalaya

zindagi apni yas-o-tamanna aag pe aag aur shoale pe shoala

dil ko hamare gham se jala kar shoala-e-ruKH se gham ko jalaya

kaisi jalan thi kaisi jalan hai jal chuke phir bhi jal nahin chukte

kash koi yun tum ko jala de jaise ki tum ne hum ko jalaya

aag hai bijli aag hain zarre aag hai suraj aag hain tare

hum ne na ki thi shoKH-nigahi aap ne kyon aalam ko jalaya