hota nahin yaqin mujhe chhoD jaega

hotā nahīñ yaqīn mujhe chhoḌ jā.egā

vo merā pyaar merī vafā āzmā.egā

ai sang-e-surḳh toḌ na nafrat kī zarb se

nāzuk hai merā shīsha-e-dil TuuT jā.egā

zar bhī zamīñ bhī nūr-e-mohammad bhī hai tirā

ik saath chal ke dekh zamāne pe chhā.egā

bhauñroñ ko itnī dāvat-e-hirs-o-havas na de

tujh se tirā gulāb-badan chhūT jā.egā

ye daur vo nahīñ hai ki muḳhlis raheñge dost

ik din koī uThegā tujhe kaaT khā.egā

mujrim ke zulm-o-jaur se hargiz na ho udaas

tujh ko sazā se munsif-e-a.alā bachā.egā

tū ne bhī apnī qaum ko baḳhshī nahīñ ziyā

ilzām ai 'qamar' ye tire sar pe aa.egā

hota nahin yaqin mujhe chhoD jaega

wo mera pyar meri wafa aazmaega

ai sang-e-surKH toD na nafrat ki zarb se

nazuk hai mera shisha-e-dil TuT jaega

zar bhi zamin bhi nur-e-mohammad bhi hai tera

ek sath chal ke dekh zamane pe chhaega

bhaunron ko itni dawat-e-hirs-o-hawas na de

tujh se tera gulab-badan chhuT jaega

ye daur wo nahin hai ki muKHlis rahenge dost

ek din koi uThega tujhe kaT khaega

mujrim ke zulm-o-jaur se hargiz na ho udas

tujh ko saza se munsif-e-ala bachaega

tu ne bhi apni qaum ko baKHshi nahin ziya

ilzam ai 'qamar' ye tere sar pe aaega