hote hain KHatm ab ye lamhat zindagi ke

hote haiñ ḳhatm ab ye lamhāt zindagī ke

mehmān haiñ jahāñ meñ ham aur do ghaḌī ke

ai be-niyāz merā sajda qubūl kar le

maiñ jāntā nahīñ huuñ ādāb bandagī ke

sāñsoñ ke taar tum ne ġhaflat se toḌ Daale

naġhme sunoge ab kyūñkar sāz-e-zindagī ke

ab ḳhairiyat nahīñ hai tanzīm-e-do-jahāñ kī

tevar batā rahe haiñ us but kī ḳhud-sarī ke

ra.anā.iyoñ pe apnī nāzāñ na hoñ bahāreñ

anjām-e-ġham nihāñ hai āġhāz meñ ḳhushī ke

hañsnā thā chaar din kā ronā hai umr bhar kā

dastūr meñ nirāle duniyā-e-āshiqī ke

umr-e-azīz kā jab anjām khul chukā hai

rone se fā.eda kyā badle meñ ab hañsī ke

ham ne rah-e-vafā meñ luT kar qadam qadam par

chhīne haiñ rahzanoñ se atvār rahzanī ke

jab tak na āzmā.eñ mushkil hai ye batānā

duniyā meñ kaun 'rif.at' qābil hai dostī ke

hote hain KHatm ab ye lamhat zindagi ke

mehman hain jahan mein hum aur do ghaDi ke

ai be-niyaz mera sajda qubul kar le

main jaanta nahin hun aadab bandagi ke

sanson ke tar tum ne ghaflat se toD Dale

naghme sunoge ab kyunkar saz-e-zindagi ke

ab KHairiyat nahin hai tanzim-e-do-jahan ki

tewar bata rahe hain us but ki KHud-sari ke

ranaiyon pe apni nazan na hon bahaaren

anjam-e-gham nihan hai aaghaz mein KHushi ke

hansna tha chaar din ka rona hai umr bhar ka

dastur mein nirale duniya-e-ashiqi ke

umr-e-aziz ka jab anjam khul chuka hai

rone se faeda kya badle mein ab hansi ke

hum ne rah-e-wafa mein luT kar qadam qadam par

chhine hain rahzanon se atwar rahzani ke

jab tak na aazmaen mushkil hai ye batana

duniya mein kaun 'rifat' qabil hai dosti ke