hoti hai aaj ahl-e-qafas mein chaman ki baat

hotī hai aaj ahl-e-qafas meñ chaman kī baat

ġhurbat meñ kar rahe haiñ musāfir vatan kī baat

aatā hai mujh ko ik dil-e-marhūm kā ḳhayāl

kartā hai jab koī kisī paimāñ-shikan kī baat

Duubī huī hai nashsha-o-nik.hat meñ chāñdnī

ye raat aur shāhid-e-gul-pairahan kī baat

ahl-e-junūñ kā qissa-e-me.arāj-e-ishq hai

mash.hūr hai jahāñ meñ jo dār-o-rasan kī baat

vīrāñ-nasībyoñ ko chhupāne ke vāste

kartā huuñ maiñ bhī logoñ meñ mil kar chaman kī baat

ye bhī hai un kī shoḳh-mizājī na pūchhiye

kahte haiñ arz-e-shauq ko dīvāna-pan kī baat

arbāb-e-shauq ke liye dars-e-hayāt hai

ye puḳhtagī-e-hausla-e-kohkan kī baat

jalte haiñ daaġh dil ke to hotī hai raushnī

kyā gul khilā ga.ī kisī sho.ala-badan kī baat

ye shaam ye sukūt ye be-kaif zindagī

dil ko masal rahī hai tirī anjuman kī baat

nazroñ meñ jhūmtī hai bahār-e-jamāl-e-yār

hoñToñ ko chūmtī hai gul-o-nastaran kī baat

suljhā rahā huuñ zulf-e-urūs-e-junūñ ko maiñ

ai kaash koī chheḌe na dār-o-rasan kī baat

misl-e-nasīm shohra-e-husn-e-butāñ ke saath

pahuñchī hai dūr-dūr tak arbāb-e-fan kī baat

bād-e-sumūm kartī hai ġhunchoñ ko muzmahil

dil ko malūl kartī hai ranj-o-mehan kī baat

'nāsir' isī meñ fan kī taraqqī kā raaz hai

ahl-e-nazar kareñ na mazāq-e-kuhan kī baat

hoti hai aaj ahl-e-qafas mein chaman ki baat

ghurbat mein kar rahe hain musafir watan ki baat

aata hai mujh ko ek dil-e-marhum ka KHayal

karta hai jab koi kisi paiman-shikan ki baat

Dubi hui hai nashsha-o-nikhat mein chandni

ye raat aur shahid-e-gul-pairahan ki baat

ahl-e-junun ka qissa-e-mearaj-e-ishq hai

mashhur hai jahan mein jo dar-o-rasan ki baat

viran-nasibyon ko chhupane ke waste

karta hun main bhi logon mein mil kar chaman ki baat

ye bhi hai un ki shoKH-mizaji na puchhiye

kahte hain arz-e-shauq ko diwana-pan ki baat

arbab-e-shauq ke liye dars-e-hayat hai

ye puKHtagi-e-hausla-e-kohkan ki baat

jalte hain dagh dil ke to hoti hai raushni

kya gul khila gai kisi shoala-badan ki baat

ye sham ye sukut ye be-kaif zindagi

dil ko masal rahi hai teri anjuman ki baat

nazron mein jhumti hai bahaar-e-jamal-e-yar

honTon ko chumti hai gul-o-nastaran ki baat

suljha raha hun zulf-e-urus-e-junun ko main

ai kash koi chheDe na dar-o-rasan ki baat

misl-e-nasim shohra-e-husn-e-butan ke sath

pahunchi hai dur-dur tak arbab-e-fan ki baat

baad-e-sumum karti hai ghunchon ko muzmahil

dil ko malul karti hai ranj-o-mehan ki baat

'nasir' isi mein fan ki taraqqi ka raaz hai

ahl-e-nazar karen na mazaq-e-kuhan ki baat