hoti hai labon par KHamoshi aankhon mein mohabbat hoti hai

hotī hai laboñ par ḳhāmoshī āñkhoñ meñ mohabbat hotī hai

jab un se nigāheñ miltī haiñ us vaqt ye hālat hotī hai

rañgīni-e-bazm-e-duniyā meñ aisā bhī zamāna aatā hai

vo dard qazā ban jaatā hai jis dard meñ rāhat hotī hai

ye tujh pe falak ne zulm kiyā vo mujh se judā maiñ un se judā

ḳhushiyāñ to manāo ahl-e-jahāñ barbād mohabbat hotī hai

aate haiñ vo sair-e-gulshan ko kāñToñ se bachā.e dāman ko

hoñToñ pe tabassum hai un ke āñkhoñ se sharārat hotī hai

dekhā hai hamārī āñkhoñ ne ye baat haqīqat hotī hai

har shaḳhs mehrbāñ hotā hai jab us kī ināyat hotī hai

tanhā.ī ke aalam meñ aksar dil us se bahaltā hai 'shevan'

tārīki-e-shām-e-hijrāñ meñ ġham kī bhī zarūrat hotī hai

hoti hai labon par KHamoshi aankhon mein mohabbat hoti hai

jab un se nigahen milti hain us waqt ye haalat hoti hai

rangini-e-bazm-e-duniya mein aisa bhi zamana aata hai

wo dard qaza ban jata hai jis dard mein rahat hoti hai

ye tujh pe falak ne zulm kiya wo mujh se juda main un se juda

KHushiyan to manao ahl-e-jahan barbaad mohabbat hoti hai

aate hain wo sair-e-gulshan ko kanTon se bachae daman ko

honTon pe tabassum hai un ke aankhon se shararat hoti hai

dekha hai hamari aankhon ne ye baat haqiqat hoti hai

har shaKHs mehrban hota hai jab us ki inayat hoti hai

tanhai ke aalam mein aksar dil us se bahalta hai 'shewan'

tariki-e-sham-e-hijran mein gham ki bhi zarurat hoti hai