hoti hai tabiat hi KHuda-dad kisi ki

hotī hai tabī.at hī ḳhudā-dād kisī kī

ulfat meñ vafā.eñ nahīñ ījād kisī kī

nākām phirī arsh se fariyād kisī kī

kis dar se umīdeñ huiiñ barbād kisī kī

allāh re pābandī-e-ādāb-e-mohabbat

fariyād bhī goyā nahīñ āzād kisī kī

aa ai ġham-e-daurāñ tujhe siine se lagā luuñ

bhūle se bhī aatī nahīñ ab yaad kisī kī

unvān-e-mohabbat hai nigāh-e-ġhalat-andāz

mustaġhnī-e-tamhīd hai rūdād kisī kī

miTte hue is tarah kisī ko nahīñ dekhā

jis tarah se hastī huī barbād kisī kī

afsāna-e-farhād kī tamhīd uThā.ī

hamrāz magar kah gayā rūdād kisī kī

gustāḳh tamannāoñ ne kyā chheḌ diyā hai

sharmā.ī huī dil meñ hai kyoñ yaad kisī kī

kis dard bhare dil kī 'munīr' aah sadā hai

ik paikar-e-betāb hai fariyād kisī kī

hoti hai tabiat hi KHuda-dad kisi ki

ulfat mein wafaen nahin ijad kisi ki

nakaam phiri arsh se fariyaad kisi ki

kis dar se umiden huin barbaad kisi ki

allah re pabandi-e-adab-e-mohabbat

fariyaad bhi goya nahin aazad kisi ki

aa ai gham-e-dauran tujhe sine se laga lun

bhule se bhi aati nahin ab yaad kisi ki

unwan-e-mohabbat hai nigah-e-ghalat-andaz

mustaghni-e-tamhid hai rudad kisi ki

miTte hue is tarah kisi ko nahin dekha

jis tarah se hasti hui barbaad kisi ki

afsana-e-farhad ki tamhid uThai

hamraaz magar kah gaya rudad kisi ki

gustaKH tamannaon ne kya chheD diya hai

sharmai hui dil mein hai kyon yaad kisi ki

kis dard bhare dil ki 'munir' aah sada hai

ek paikar-e-betab hai fariyaad kisi ki