hoti nahin rasai-e-barq-e-tapan kahan

hotī nahīñ rasā.ī-e-barq-e-tapāñ kahāñ

ai ham-nashīñ banā.iye ab āshiyāñ kahāñ

Thahre misāl terī gul-e-arġhavāñ kahāñ

ai mah-jabīñ zamīn kahāñ āsmāñ kahāñ

chhānā kiyā maiñ ḳhāk-e-do-ālam tamām umr

apnī talāsh le ga.ī mujh ko kahāñ kahāñ

chhuTtā hujūm-e-ġham se mirā saath kis tarah

jaatā bichhaḌ ke mujh se mirā kārvāñ kahāñ

mahdūd jin kī dair-o-haram tak thī justujū

hotā nasīb un ko tirā āstāñ kahāñ

har manzil-e-hayāt kī had paar ho chukī

le jā.egī ab aur ai umr-e-ravāñ kahāñ

sayyād ne bhī mujh ko rihā kar diyā 'jalīs'

qismat meñ ab qafas bhī nahīñ āshiyāñ kahāñ

hoti nahin rasai-e-barq-e-tapan kahan

ai ham-nashin banaiye ab aashiyan kahan

Thahre misal teri gul-e-arghawan kahan

ai mah-jabin zamin kahan aasman kahan

chhana kiya main KHak-e-do-alam tamam umr

apni talash le gai mujh ko kahan kahan

chhuTta hujum-e-gham se mera sath kis tarah

jata bichhaD ke mujh se mera karwan kahan

mahdud jin ki dair-o-haram tak thi justuju

hota nasib un ko tera aastan kahan

har manzil-e-hayat ki had par ho chuki

le jaegi ab aur ai umr-e-rawan kahan

sayyaad ne bhi mujh ko riha kar diya 'jalis'

qismat mein ab qafas bhi nahin aashiyan kahan