hua de kar dabe shoalon ko bhaDkaya nahin jata

huā de kar dabe sho.aloñ ko bhaḌkāyā nahīñ jaatā

dikhā kar jaam mai pyāsoñ ko tarsāyā nahīñ jaatā

na le jā duur gulshan se are sayyād bulbul ko

ki bīmār-e-mohabbat par sitam Dhāyā nahīñ jaatā

tirī tar-dāmanī ko dekh kar kuchh shak sā hotā hai

ki dhabba dāman-e-ma.asūm par paayā nahīñ jaatā

haiñ donoñ nuur ke TukḌe magar hifz-e-marātib se

sitāroñ ko shah-e-ḳhāvar se Takrāyā nahīñ jaatā

bahāro hai burī ye baat ham se āshiq-e-gul ko

dikhā ke rū-e-gul kāñToñ meñ uljhāyā nahīñ jaatā

na kar nashtar-zanī sayyād sāda-lauh bulbul par

na jaane jo taḌapnā us ko taḌpāyā nahīñ jaatā

'zahīr'-e-ḳhasta ye bhī ik usuul pās-e-ulfat hai

zabāñ par kalma-e-shikva kabhī laayā nahīñ jaatā

hua de kar dabe shoalon ko bhaDkaya nahin jata

dikha kar jam mai pyason ko tarsaya nahin jata

na le ja dur gulshan se are sayyaad bulbul ko

ki bimar-e-mohabbat par sitam Dhaya nahin jata

teri tar-damani ko dekh kar kuchh shak sa hota hai

ki dhabba daman-e-masum par paya nahin jata

hain donon nur ke TukDe magar hifz-e-maraatib se

sitaron ko shah-e-KHawar se Takraya nahin jata

bahaaro hai buri ye baat hum se aashiq-e-gul ko

dikha ke ru-e-gul kanTon mein uljhaya nahin jata

na kar nashtar-zani sayyaad sada-lauh bulbul par

na jaane jo taDapna us ko taDpaya nahin jata

'zahir'-e-KHasta ye bhi ek usul pas-e-ulfat hai

zaban par kalma-e-shikwa kabhi laya nahin jata