hua hai sar mein sauda phir kisi zulf-e-pareshan ka

huā hai sar meñ saudā phir kisī zulf-e-pareshāñ kā

na dāman kī ḳhabar ham ko na hosh apne garebāñ kā

kabhī jo dekh leñ mahfil meñ vo in tirchhī nazroñ se

nazar aa.e samāñ us vaqt phir ganj-e-shahīdāñ kā

vo karte to haiñ va.ada roz lekin vā.e-nākāmī

nahīñ hai paas un ko kuchh bhī apne ahd-o-paimāñ kā

mujhe dafnāne vo aa.e to madfan meñ ye shor uTThā

tire marne se jaagā baḳht hai gor-e-ġharībāñ kā

ta.ajjub kyā pasīje ek din dil us sitamgar kā

agar ro kar sunā duuñ us ko qissa shām-e-hijrāñ kā

mirī jaañ kā hai tālib vo ki dil se phir gayā ab dil

zarā dekho to 'shaidā' mo.ajiza us āfat-e-jāñ kā

hua hai sar mein sauda phir kisi zulf-e-pareshan ka

na daman ki KHabar hum ko na hosh apne gareban ka

kabhi jo dekh len mahfil mein wo in tirchhi nazron se

nazar aae saman us waqt phir ganj-e-shahidan ka

wo karte to hain wada roz lekin wae-nakaami

nahin hai pas un ko kuchh bhi apne ahd-o-paiman ka

mujhe dafnane wo aae to madfan mein ye shor uTTha

tere marne se jaga baKHt hai gor-e-ghariban ka

tajjub kya pasije ek din dil us sitamgar ka

agar ro kar suna dun us ko qissa sham-e-hijran ka

meri jaan ka hai talib wo ki dil se phir gaya ab dil

zara dekho to 'shaida' moajiza us aafat-e-jaan ka