hua hai zer-e-zamin aasman ajib sa kuchh

huā hai zer-e-zamīñ āsmāñ ajiib sā kuchh

maiñ jis meñ rahtā huuñ vo hai makāñ ajiib sā kuchh

falak se aatā hai ruq.a hamāre hone kā

hai apne māthe pe raushan nishāñ ajiib sā kuchh

kahāñ kā vasl bhalā aur kahāñ kī hasrat-e-vasl

har ek lamha huā be-amāñ ajiib sā kuchh

anā kī jis se thī ummīd vo hai nañg-e-anā

jise thā honā vahī hai yahāñ ajiib sā kuchh

kahāñ maiñ hotā huuñ āmāda kahne sunñe par

lahū se merī ragoñ meñ ravāñ ajiib sā kuchh

maiñ jabr apnī tabī.at pe jab bhī kartā huuñ

dikhā.ī detā hai mujh ko jahāñ ajiib sā kuchh

hai tere sheroñ meñ kuchh aisī ḳhush-gumānī 'tūr'

bayān-e-husn hai husn-e-bayāñ ajiib sā kuchh

hua hai zer-e-zamin aasman ajib sa kuchh

main jis mein rahta hun wo hai makan ajib sa kuchh

falak se aata hai ruqa hamare hone ka

hai apne mathe pe raushan nishan ajib sa kuchh

kahan ka wasl bhala aur kahan ki hasrat-e-wasl

har ek lamha hua be-aman ajib sa kuchh

ana ki jis se thi ummid wo hai nang-e-ana

jise tha hona wahi hai yahan ajib sa kuchh

kahan main hota hun aamada kahne sunne par

lahu se meri ragon mein rawan ajib sa kuchh

main jabr apni tabiat pe jab bhi karta hun

dikhai deta hai mujh ko jahan ajib sa kuchh

hai tere sheron mein kuchh aisi KHush-gumani 'tur'

bayan-e-husn hai husn-e-bayan ajib sa kuchh