hua ek din mein humse ghair achchha

huā ik din meñ ham se ġhair achchhā

paḌā dar par kisī kā pair achchhā

kahā hai maiñ ne jo dekhā sunā hai

jo tum samjho burā to ḳhair achchhā

mohabbat ham se muñh dekhe kī yaaro

ho dil khoTā to muñh kā bair achchhā

hamāre rū-ba-rū laao to us ko

kaheñge ham haram se dair achchhā

miTā kar chal diye vo naqsh-e-pā bhī

hameñ ġhairoñ pe chhoḌā ḳhair achchhā

musībat meñ huā koī na apnā

agar hamdard ho to ġhair achchhā

vafā ko bhī tirī vo jaur samjhe

'kañval' tū ne kamāyā bair achchhā

hua ek din mein hum se ghair achchha

paDa dar par kisi ka pair achchha

kaha hai main ne jo dekha suna hai

jo tum samjho bura to KHair achchha

mohabbat hum se munh dekhe ki yaro

ho dil khoTa to munh ka bair achchha

hamare ru-ba-ru lao to us ko

kahenge hum haram se dair achchha

miTa kar chal diye wo naqsh-e-pa bhi

hamein ghairon pe chhoDa KHair achchha

musibat mein hua koi na apna

agar hamdard ho to ghair achchha

wafa ko bhi teri wo jaur samjhe

'kanwal' tu ne kamaya bair achchha