ہوا جاتا ہے پنہاں راز دل میرا عیاں ہو کر

ہوا جاتا ہے پنہاں راز دل میرا عیاں ہو کر

دہان زخم پچتاتے ہیں کیا کیا بے زباں ہو کر

مدد اے ہمت گردوں شکن اب ضعف سے کب تک

رہیں گے نالہ ہائے بے اثر دل میں نہاں ہو کر

یکایک ہو گئی کیوں خانہ‌ بربادی خدا جانے

گری کس کی نگاہ قہر برق خانماں ہو کر

جو ناقوس برہمن بت کدہ میں تھا تو مسجد میں

لب زاہد سے بھی نکلا مرا نالہ اذاں ہو کر

یہ خنجر ہے یہ دشمن ہے یہ میں ہوں کیا توقف ہے

وہ آئیں بھی کہیں آمادہ بہر امتحاں ہو کر

رہے کیا راز اس مجروح کا پنہاں کہ جب نکلے

دہان زخم سے پیکاں رقیبوں کی زباں ہو کر

ہوئی تسکیں نہ میرے قلب وحشت دوست کو راسخؔ

لباس زندگی جب تک نہ اترا دھجیاں ہو کر