hua jata hai pinhan raaz-e-dil mera ayan ho kar

huā jaatā hai pinhāñ rāz-e-dil merā ayaañ ho kar

dahān-e-zaḳhm pachtāte haiñ kyā kyā be-zabāñ ho kar

madad ai himmat-e-gardūñ-shikan ab zo.af se kab tak

raheñge nāla-hā-e-be-asar dil meñ nihāñ ho kar

yakāyak ho ga.ī kyoñ ḳhāna-barbādī ḳhudā jaane

girī kis kī nigāh-e-qahr barq-e-ḳhānumāñ ho kar

jo nāqūs-e-barahman but-kada meñ thā to masjid meñ

lab-e-zāhid se bhī niklā mirā naala azaañ ho kar

ye ḳhanjar hai ye dushman hai ye maiñ huuñ kyā tavaqquf hai

vo aa.eñ bhī kahīñ āmāda bahr-e-imtihāñ ho kar

rahe kyā raaz is majrūh kā pinhāñ ki jab nikle

dahān-e-zaḳhm se paikāñ raqīboñ kī zabāñ ho kar

huī taskīñ na mere qalb-e-vahshat-dost ko 'rāsiḳh'

libās-e-zindagī jab tak na utrā dhajjiyāñ ho kar

hua jata hai pinhan raaz-e-dil mera ayan ho kar

dahan-e-zaKHm pachtate hain kya kya be-zaban ho kar

madad ai himmat-e-gardun-shikan ab zoaf se kab tak

rahenge nala-ha-e-be-asar dil mein nihan ho kar

yakayak ho gai kyon KHana-barbaadi KHuda jaane

giri kis ki nigah-e-qahr barq-e-KHanuman ho kar

jo naqus-e-barahman but-kada mein tha to masjid mein

lab-e-zahid se bhi nikla mera nala azan ho kar

ye KHanjar hai ye dushman hai ye main hun kya tawaqquf hai

wo aaen bhi kahin aamada bahr-e-imtihan ho kar

rahe kya raaz is majruh ka pinhan ki jab nikle

dahan-e-zaKHm se paikan raqibon ki zaban ho kar

hui taskin na mere qalb-e-wahshat-dost ko 'rasiKH'

libas-e-zindagi jab tak na utra dhajjiyan ho kar