hua jab jalwa-ara aap ka zauq-e-KHud-arai

huā jab jalva-ārā aap kā zauq-e-ḳhud-ārā.ī

tamāshā rah gayā ban kar jahāñ kā har tamāshā.ī

bahāreñ hī huā kartī haiñ tamhīd-e-ḳhizāñ aksar

vahāñ barsoñ rahā mātam jahāñ pal bhar ḳhushī aa.ī

bahar-sūrat qayāmat hai vo aa.eñ yā chale jaa.eñ

jo aa.e to sukūñ chhīnā ga.e to jaan taḌpā.ī

kalī chaTkī na gul mahke na ġhunchoñ par nikhār aayā

ajab andāz se ab ke gulistāñ meñ bahār aa.ī

jahāñ mujh ko nazar aayā koī naqsh-e-qadam un kā

vahīñ ik dam taḌap uTThā mirā zauq-e-jabīñ-sā.ī

ye kyā tarz-e-musāvāt-e-jahāñ hai ādil-e-mutlaq

kahīñ aa.heñ nikaltī haiñ kahīñ bajtī hai shahnā.ī

mirī ḳhalvat meñ lākhoñ ārzūeñ jalva-farmā haiñ

kahīñ mahfil se baḌh kar hai mirī ai 'barq' tanhā.ī

hua jab jalwa-ara aap ka zauq-e-KHud-arai

tamasha rah gaya ban kar jahan ka har tamashai

bahaaren hi hua karti hain tamhid-e-KHizan aksar

wahan barson raha matam jahan pal bhar KHushi aai

bahar-surat qayamat hai wo aaen ya chale jaen

jo aae to sukun chhina gae to jaan taDpai

kali chaTki na gul mahke na ghunchon par nikhaar aaya

ajab andaz se ab ke gulistan mein bahaar aai

jahan mujh ko nazar aaya koi naqsh-e-qadam un ka

wahin ek dam taDap uTTha mera zauq-e-jabin-sai

ye kya tarz-e-musawat-e-jahan hai aadil-e-mutlaq

kahin aahen nikalti hain kahin bajti hai shahnai

meri KHalwat mein lakhon aarzuen jalwa-farma hain

kahin mahfil se baDh kar hai meri ai 'barq' tanhai