hua kam na jis ka asar zindagi bhar

huā kam na jis kā asar zindagī bhar

nazar meñ rahī vo nazar zindagī bhar

ham un ke tasavvur meñ kho.e hue haiñ

na ho un ko shāyad ḳhabar zindagī bhar

hamāre tasavvur meñ thā jis kā naqshā

na paayā hameñ vo hī ghar zindagī bhar

na aa.egā vo lauT kar ye ḳhabar thī

rahā muntazir maiñ magar zindagī bhar

kaheñ be-hunar ham use kis hunar se

na aayā hameñ ye hunar zindagī bhar

vo merī uḌānoñ se ḳhā.if thā shāyad

katartā rahā mere par zindagī bhar

na utregā ehsān ik pal kā 'vājid'

kareñ maañ kī ḳhidmat agar zindagī bhar

hua kam na jis ka asar zindagi bhar

nazar mein rahi wo nazar zindagi bhar

hum un ke tasawwur mein khoe hue hain

na ho un ko shayad KHabar zindagi bhar

hamare tasawwur mein tha jis ka naqsha

na paya hamein wo hi ghar zindagi bhar

na aaega wo lauT kar ye KHabar thi

raha muntazir main magar zindagi bhar

kahen be-hunar hum use kis hunar se

na aaya hamein ye hunar zindagi bhar

wo meri uDanon se KHaif tha shayad

katarta raha mere par zindagi bhar

na utrega ehsan ek pal ka 'wajid'

karen man ki KHidmat agar zindagi bhar