hua kare jo andhera bahut ghanera hai

huā kare jo añdherā bahut ghanerā hai

kisī kī zulf tale har samay saverā hai

hikāyat-e-lab-o-ruḳhsār meñ guzār deñ vaqt

jahāñ meñ sirf ghaḌī do ghaḌī baserā hai

jalāo ghar kī muñDeroñ pe chashm-o-dil ke diye

bahāo giit birah ke bahut añdherā hai

vo mohtasib ho ki shahna ki muftī-o-qāzī

hamārā koī nahīñ hai har ek terā hai

mire dimāġh ke ḳhannās ne pasand kiyā

khañDar ke haft-balāoñ kā jis meñ Derā hai

maiñ barg-e-zard huuñ shāyān-e-iltifāt nahīñ

hasīn gul ko hasīñ titliyoñ ne gherā hai

hua kare jo andhera bahut ghanera hai

kisi ki zulf tale har samay sawera hai

hikayat-e-lab-o-ruKHsar mein guzar den waqt

jahan mein sirf ghaDi do ghaDi basera hai

jalao ghar ki munDeron pe chashm-o-dil ke diye

bahao git birah ke bahut andhera hai

wo mohtasib ho ki shahna ki mufti-o-qazi

hamara koi nahin hai har ek tera hai

mere dimagh ke KHannas ne pasand kiya

khanDar ke haft-balaon ka jis mein Dera hai

main barg-e-zard hun shayan-e-iltifat nahin

hasin gul ko hasin titliyon ne ghera hai