hua na mujhse koi ham-kalam gardish mein

huā na mujh se koī ham-kalām gardish meñ

dhuāñ hue haiñ mire sub.h-o-shām gardish meñ

ḳhayāl-o-ḳhvāb huā har zamāna-e-vahshat

utar chuke haiñ sabhī ḳhush-ḳhirām gardish meñ

maiñ bhāgtā huuñ sar-e-dasht-e-karbalā aur phir

izāfa karte haiñ aa kar imaam gardish meñ

mirī talab mirī raftār ke munāfī hai

maiñ ḳhaas shaḳhs huuñ rahtā huuñ 'aam gardish meñ

panap rahā hai kahīñ dil meñ shauq-e-dīd-o-shunīd

dhaḌak rahe haiñ zamāne mudām gardish meñ

badal badal ke ka.ī haath hashr uThātā hai

banā rahā hai koī rāh-e-jām gardish meñ

ḳhudā kā shukr adā kartā huuñ maiñ sub.h-o-masā

laboñ pe rakh ke darūd-o-salām gardish meñ

badaltā rahtā hai chalne se mai-kade kā nizām

ki chal-chalāv se rahtā hai jaam gardish meñ

rah-e-fanā pe qadam rakh ke phañs na jā.ūñ kahīñ

lagā rakhā hai ḳhudā.ī ne daam gardish meñ

rukā huā huuñ maiñ ik gardishī jazīre par

guzar rahe haiñ mire sub.h-o-shām gardish meñ

ruke hue haiñ sabhī dost kyoñ 'fidā' mire

milegā un ko yaqīnan davām gardish meñ

hua na mujh se koi ham-kalam gardish mein

dhuan hue hain mere subh-o-sham gardish mein

KHayal-o-KHwab hua har zamana-e-wahshat

utar chuke hain sabhi KHush-KHiram gardish mein

main bhagta hun sar-e-dasht-e-karbala aur phir

izafa karte hain aa kar imam gardish mein

meri talab meri raftar ke munafi hai

main KHas shaKHs hun rahta hun 'am gardish mein

panap raha hai kahin dil mein shauq-e-did-o-shunid

dhaDak rahe hain zamane mudam gardish mein

badal badal ke kai hath hashr uThata hai

bana raha hai koi rah-e-jam gardish mein

KHuda ka shukr ada karta hun main subh-o-masa

labon pe rakh ke darud-o-salam gardish mein

badalta rahta hai chalne se mai-kade ka nizam

ki chal-chalaw se rahta hai jam gardish mein

rah-e-fana pe qadam rakh ke phans na jaun kahin

laga rakha hai KHudai ne dam gardish mein

ruka hua hun main ek gardishi jazire par

guzar rahe hain mere subh-o-sham gardish mein

ruke hue hain sabhi dost kyon 'fida' mere

milega un ko yaqinan dawam gardish mein