hubab-asa mein dam bharta hun teri aashnai ka

hubāb-āsā meñ dam bhartā huuñ terī āshnā.ī kā

nihāyat ġham hai is qatre ko dariyā kī judā.ī kā

asiir ai dost tere āshiq o ma.ashūq donoñ haiñ

giraftār āhanī zanjīr kā ye vo tilā.ī kā

ta'alluq ruuh se mujh ko jasad kā nā-gavārā hai

zamāne meñ chalan hai chaar din kī āshnā.ī kā

firāq-e-yār meñ mar mar ke āḳhir zindagānī ke

rahā sadma hamesha ruuh o qālib kī judā.ī kā

huī manzūr muhtājī na tujh ko apnī saa.il kī

banāyā kāsa-e-sar vāzhgūñ kaasa gadā.ī kā

nazar aatī haiñ har-sū sūrateñ hī sūrateñ mujh ko

koī ā.īna-ḳhāna kār-ḳhāna hai judā.ī kā

visāl-e-yār kā va.ada hai fardā-e-qayāmat par

yaqīñ mujh ko nahīñ hai gor tak apnī rasā.ī kā

bharosa aah par hargiz nahīñ ai yaar āshiq ko

shikār ab tak kahīñ dekhā nahīñ tīr-e-havā.ī kā

dikhāyā husn se e.ajāz-e-mūsī cilk-e-qudarat ne

yad-e-baizā banāyā chuur añgusht-e-hinā.ī kā

nahīñ miTtī hai patthar kī lakīr ahbāb kahte haiñ

rahegā pā-e-but par naqsh apnī jab.ha-sā.ī kā

shikast-e-ḳhātir-e-ahbāb hotī hai durust is se

tavajjoh meñ tirī ai yaar asar hai momyā.ī kā

dil apnā ā.īna sā saaf ishq-e-pāk rakhtā hai

tamāshā dekhtā hai husn is meñ ḳhud-numā.ī kā

kaf-e-afsos malvātī hai terī pāk-dāmānī

pinhā kar shāhid-e-ismat ko jaama pārsā.ī kā

nahīñ dekhā hai lekin tujh ko pahchānā hai 'ātish' ne

bajā hai ai sanam jo tujh ko da.avā hai ḳhudā.ī kā

hubab-asa mein dam bharta hun teri aashnai ka

nihayat gham hai is qatre ko dariya ki judai ka

asir ai dost tere aashiq o mashuq donon hain

giraftar aahani zanjir ka ye wo tilai ka

ta'alluq ruh se mujh ko jasad ka na-gawara hai

zamane mein chalan hai chaar din ki aashnai ka

firaq-e-yar mein mar mar ke aaKHir zindagani ke

raha sadma hamesha ruh o qalib ki judai ka

hui manzur muhtaji na tujh ko apni sail ki

banaya kasa-e-sar wazhgun kasa gadai ka

nazar aati hain har-su suraten hi suraten mujh ko

koi aaina-KHana kar-KHana hai judai ka

visal-e-yar ka wada hai farda-e-qayamat par

yaqin mujh ko nahin hai gor tak apni rasai ka

bharosa aah par hargiz nahin ai yar aashiq ko

shikar ab tak kahin dekha nahin tir-e-hawai ka

dikhaya husn se eajaz-e-musi cilk-e-qudarat ne

yad-e-baiza banaya chur angusht-e-hinai ka

nahin miTti hai patthar ki lakir ahbab kahte hain

rahega pa-e-but par naqsh apni jabha-sai ka

shikast-e-KHatir-e-ahbab hoti hai durust is se

tawajjoh mein teri ai yar asar hai momyai ka

dil apna aaina sa saf ishq-e-pak rakhta hai

tamasha dekhta hai husn is mein KHud-numai ka

kaf-e-afsos malwati hai teri pak-damani

pinha kar shahid-e-ismat ko jama parsai ka

nahin dekha hai lekin tujh ko pahchana hai 'atish' ne

baja hai ai sanam jo tujh ko dawa hai KHudai ka