hudud-e-qarya-e-wahm-o-guman mein koi nahin

hudūd-e-qarya-e-vahm-o-gumāñ meñ koī nahīñ

mire alāva mire kārvāñ meñ koī nahīñ

charāġh jalte haiñ kyuuñ rāt-bhar mire dil meñ

bahut dinoñ se agar is makāñ meñ koī nahīñ

hai merī fat.h-o-hazīmat kā kyuuñ asar us par

sharīk agar mire sūd-o-ziyāñ meñ koī nahīñ

Thahar sake jo mire sāmne ghaḌī-do-ghaḌī

vo shahsavār saf-e-dushmanāñ meñ koī nahīñ

bhaTak rahā huuñ hujūm-e-nujūm meñ tanhā

ki mujh sā aur kisī kahkashāñ meñ koī nahīñ

ajiib ek masarrat se āshnā haiñ vo

asīr-e-ġham tire āshuftagāñ meñ koī nahīñ

milī ho jis ko virāsat meñ umr-bhar 'sājid'

vo ḳhush-nasīb kisī ḳhāk-dāñ meñ koī nahīñ

hudud-e-qarya-e-wahm-o-guman mein koi nahin

mere alawa mere karwan mein koi nahin

charagh jalte hain kyun raat-bhar mere dil mein

bahut dinon se agar is makan mein koi nahin

hai meri fath-o-hazimat ka kyun asar us par

sharik agar mere sud-o-ziyan mein koi nahin

Thahar sake jo mere samne ghaDi-do-ghaDi

wo shahsawar saf-e-dushmanan mein koi nahin

bhaTak raha hun hujum-e-nujum mein tanha

ki mujh sa aur kisi kahkashan mein koi nahin

ajib ek masarrat se aashna hain wo

asir-e-gham tere aashuftagan mein koi nahin

mili ho jis ko wirasat mein umr-bhar 'sajid'

wo KHush-nasib kisi KHak-dan mein koi nahin