hue ab to KHanjar uThane ke qabil

hue ab to ḳhanjar uThāne ke qābil

bane ho gale se lagāne ke qābil

nahīñ dīda-e-tar bahāne ke qābil

har aañsū hai motī luTāne ke qābil

vo aa.e to kab aa.e parde se bāhar

huā jab maiñ un se chhupāne ke qābil

ham apnī hī dīvār se phoḌ marte

agar sar hī hotā uThāne ke qābil

zamīñ par se ahl-e-jahāñ ko haTā do

jagah chhoḌ do tilmilāne ke qābil

abhī se mirī jaan ġhairoñ se va.ade

abhī ho to lo aane jaane ke qābil

tabassum se kyā ḳhanda-e-gul ko nisbat

kahīñ muñh bhī hai muskurāne ke qābil

ḳhudā ke liye gesūoñ ko na bal do

ye muuzī nahīñ sar chaḌhāne ke qābil

mirī qais kī kohkan kī kahānī

ye qisse haiñ sunñe sunāne ke qābil

na aa.e kahīñ maut ishq-e-butāñ meñ

ilāhī raheñ muñh dikhāne ke qābil

dil-e-soḳhta ḳhāl-e-hindū pe maa.il

musalmāñ kā murda jalāne ke qābil

butoñ se umīd-e-vafā kab hai 'sho.ala'

zamāna nahīñ dil lagāne ke qābil

hue ab to KHanjar uThane ke qabil

bane ho gale se lagane ke qabil

nahin dida-e-tar bahane ke qabil

har aansu hai moti luTane ke qabil

wo aae to kab aae parde se bahar

hua jab main un se chhupane ke qabil

hum apni hi diwar se phoD marte

agar sar hi hota uThane ke qabil

zamin par se ahl-e-jahan ko haTa do

jagah chhoD do tilmilane ke qabil

abhi se meri jaan ghairon se wade

abhi ho to lo aane jaane ke qabil

tabassum se kya KHanda-e-gul ko nisbat

kahin munh bhi hai muskurane ke qabil

KHuda ke liye gesuon ko na bal do

ye muzi nahin sar chaDhane ke qabil

meri qais ki kohkan ki kahani

ye qisse hain sunne sunane ke qabil

na aae kahin maut ishq-e-butan mein

ilahi rahen munh dikhane ke qabil

dil-e-soKHta KHal-e-hindu pe mail

musalman ka murda jalane ke qabil

buton se umid-e-wafa kab hai 'shoala'

zamana nahin dil lagane ke qabil