hue jab aaine aape se bahar

hue jab aa.ine aape se bāhar

sitamgar aa gayā chehre se bāhar

mire katre hue par uḌ rahe haiñ

abhī maujūd huuñ piñjre se bāhar

yaqīnan jeb-katre to mileñge

to kyā baiThā rahūñ mele se bāhar

muazzin piir se kamzor niklā

murīd aayā nahīñ hujre se bāhar

munāsib daam jo batlā.e maiñ ne

dukāñ kar dī ga.ī mele se bāhar

vahī tasvīr ho jaatī hai mailī

nikal aatī hai jo shīshe se bāhar

luġhat ko chhoḌ jaate haiñ vo alfāz

jinheñ kartā hai tū qisse se bāhar

tire bīmār bhī ziddī bahut haiñ

nikalte hī nahīñ ḳhatre se bāhar

hue jab aaine aape se bahar

sitamgar aa gaya chehre se bahar

mere katre hue par uD rahe hain

abhi maujud hun pinjre se bahar

yaqinan jeb-katre to milenge

to kya baiTha rahun mele se bahar

muazzin pir se kamzor nikla

murid aaya nahin hujre se bahar

munasib dam jo batlae main ne

dukan kar di gai mele se bahar

wahi taswir ho jati hai maili

nikal aati hai jo shishe se bahar

lughat ko chhoD jate hain wo alfaz

jinhen karta hai tu qisse se bahar

tere bimar bhi ziddi bahut hain

nikalte hi nahin KHatre se bahar