hue jo sath nazaron ne rashk karna hai

hue jo saath nazāroñ ne rashk karnā hai

hamāre baḳht pe yāroñ ne rashk karnā hai

tumhārā haath agar haath meñ rahā yūñhī

ḳhizāñ-rutoñ pe bahāroñ ne rashk karnā hai

ham is ke zarroñ meñ chāhat kā nuur bhar deñge

hamāre thal pe sitāroñ ne rashk karnā hai

lagegā phuul ko rakkhā huā hai kāñdhoñ par

uThā ke Dolī kahāroñ ne rashk karnā hai

hamāre sher mohabbat kā isti.āra haiñ

so ek do nahīñ sāroñ ne rashk karnā hai

bahā ke laane haiñ dariyā ne kitne phuul magar

kisī kisī pe kināroñ ne rashk karnā hai

maiñ jang haar ke jītūñgā is tarah 'ḳhālid'

sabhī piyādoñ savāroñ ne rashk karnā hai

hue jo sath nazaron ne rashk karna hai

hamare baKHt pe yaron ne rashk karna hai

tumhaara hath agar hath mein raha yunhi

KHizan-ruton pe bahaaron ne rashk karna hai

hum is ke zarron mein chahat ka nur bhar denge

hamare thal pe sitaron ne rashk karna hai

lagega phul ko rakkha hua hai kandhon par

uTha ke Doli kahaaron ne rashk karna hai

hamare sher mohabbat ka istiara hain

so ek do nahin saron ne rashk karna hai

baha ke lane hain dariya ne kitne phul magar

kisi kisi pe kinaron ne rashk karna hai

main jang haar ke jitunga is tarah 'KHalid'

sabhi piyaadon sawaron ne rashk karna hai