hue KHalq jab se jahan mein hum hawas-e-nazara-e-yar hai

hue ḳhalq jab se jahāñ meñ ham havas-e-nazāra-e-yār hai

Thahar ai ajal ki vo ā.eñge dam-e-vāpsīñ kā qarār hai

raheñ mahv kyuuñ na har ek dam ki nazar meñ jalva-e-yār hai

dil-e-muntazir hai jo aa.ina to ḳhayāl ā.ina-dār hai

ye ḳhatā-e-ishq kī dī sazā ki mizha se mardum-e-chashm ne

mirā dil dikhā ke ye kah diyā ise lo ye qābil-e-dār hai

ye ḳhudā hī jaane vo kaun thā jo shahīd-e-nāz-o-adā huā

ki uḌī hai ḳhāk-e-rah-e-sanam to ḳhizāñ meñ rañg-e-bahār hai

huiiñ tark saarī mohabbateñ mire sar pe Dhaa.ī haiñ āfateñ

yahī dil ke lene meñ shart thī yahī mujh se qaul-o-qarār hai

ye junūñ kī dekhiye puḳhtagī jo kabhī kisī ne na ho sunī

mire pairahan kā jo taar hai vo har ek resha-e-ḳhār hai

koī dil kī niklī na aarzū huā ranj-o-ġham se jigar lahū

phire ḳhaak chhānte kū-ba-kū na to sabr hai na qarār hai

pas-e-marg bhī haiñ vahī sitam haiñ jafā.eñ ruuh pe dam-ba-dam

idhar aate aate vo phir ga.e jo sunā ki merā mazār hai

mire siine ko na hadaf karo tapish-e-jigar se Dare raho

par-e-murġh-e-tīr na jal uTheñ ki lahū ba-rañg-e-sharār hai

vo ḳhushī dikhā.ī na charḳh ne ki evaz meñ jis ke na ġham diye

kabhī farsh-e-gul hai jo ek shab to mahīnoñ bistar-e-ḳhār hai

jise dard-e-nāla-o-āh hai jo shahīd-e-teġh-e-nigāh hai

shab-e-hijr us kī gavāh hai vo 'habīb'-e-sīna-figār hai

hue KHalq jab se jahan mein hum hawas-e-nazara-e-yar hai

Thahar ai ajal ki wo aaenge dam-e-wapsin ka qarar hai

rahen mahw kyun na har ek dam ki nazar mein jalwa-e-yar hai

dil-e-muntazir hai jo aaina to KHayal aaina-dar hai

ye KHata-e-ishq ki di saza ki mizha se mardum-e-chashm ne

mera dil dikha ke ye kah diya ise lo ye qabil-e-dar hai

ye KHuda hi jaane wo kaun tha jo shahid-e-naz-o-ada hua

ki uDi hai KHak-e-rah-e-sanam to KHizan mein rang-e-bahaar hai

huin tark sari mohabbaten mere sar pe Dhai hain aafaten

yahi dil ke lene mein shart thi yahi mujh se qaul-o-qarar hai

ye junun ki dekhiye puKHtagi jo kabhi kisi ne na ho suni

mere pairahan ka jo tar hai wo har ek resha-e-KHar hai

koi dil ki nikli na aarzu hua ranj-o-gham se jigar lahu

phire KHak chhante ku-ba-ku na to sabr hai na qarar hai

pas-e-marg bhi hain wahi sitam hain jafaen ruh pe dam-ba-dam

idhar aate aate wo phir gae jo suna ki mera mazar hai

mere sine ko na hadaf karo tapish-e-jigar se Dare raho

par-e-murgh-e-tir na jal uThen ki lahu ba-rang-e-sharar hai

wo KHushi dikhai na charKH ne ki ewaz mein jis ke na gham diye

kabhi farsh-e-gul hai jo ek shab to mahinon bistar-e-KHar hai

jise dard-e-nala-o-ah hai jo shahid-e-tegh-e-nigah hai

shab-e-hijr us ki gawah hai wo 'habib'-e-sina-figar hai