hue kyun us pe aashiq hum abhi se

hue kyuuñ us pe āshiq ham abhī se

lagāyā jī ko nāhaq ġham abhī se

dilā rabt us se rakhnā kam abhī se

jatā dete haiñ tujh ko ham abhī se

tire bīmār-e-ġham ke haiñ jo ġham-ḳhvār

barastā un pe hai mātam abhī se

ġhazab aayā hileñ gar us kī mizhgāñ

saf-e-ushshāq hai barham abhī se

agarche der hai jaane meñ tere

nahīñ par apne dam meñ dam abhī se

bhigo rahvegā girya jaib o dāman

rahe hai āstīñ pur-nam abhī se

tumhārā mujh ko pās-e-ābrū thā

vagarna ashk jaate tham abhī se

lage siisa pilāne mujh ko aañsū

ki ho buniyād-e-ġham mohkam abhī se

kahā jaane ko kis ne meñh khule par

ki chhāyā dil pe abr-e-ġham abhī se

nikalte hī dam uThvāte haiñ mujh ko

hue be-zār yuuñ hamdam abhī se

abhī dil par jarāhat sau na do sau

dharā hai dosto marham abhī se

kiyā hai vāda-e-dīdār kis ne

ki hai mushtāq ik aalam abhī se

marā jaanā mujhe ġhairoñ ne ai 'zauq'

ki phirte haiñ ḳhush-o-ḳhurram abhī se

hue kyun us pe aashiq hum abhi se

lagaya ji ko nahaq gham abhi se

dila rabt us se rakhna kam abhi se

jata dete hain tujh ko hum abhi se

tere bimar-e-gham ke hain jo gham-KHwar

barasta un pe hai matam abhi se

ghazab aaya hilen gar us ki mizhgan

saf-e-ushshaq hai barham abhi se

agarche der hai jaane mein tere

nahin par apne dam mein dam abhi se

bhigo rahwega girya jaib o daman

rahe hai aastin pur-nam abhi se

tumhaara mujh ko pas-e-abru tha

wagarna ashk jate tham abhi se

lage sisa pilane mujh ko aansu

ki ho buniyaad-e-gham mohkam abhi se

kaha jaane ko kis ne meinh khule par

ki chhaya dil pe abr-e-gham abhi se

nikalte hi dam uThwate hain mujh ko

hue be-zar yun hamdam abhi se

abhi dil par jarahat sau na do sau

dhara hai dosto marham abhi se

kiya hai wada-e-didar kis ne

ki hai mushtaq ek aalam abhi se

mara jaana mujhe ghairon ne ai 'zauq'

ki phirte hain KHush-o-KHurram abhi se