ہوئے تھے کیسی حقیقت سے بد گماں ہم لوگ

ہوئے تھے کیسی حقیقت سے بد گماں ہم لوگ

جو ہر سو دیکھ رہے ہیں دھواں دھواں ہم لوگ

ہمیں سے اصل بنائے حیات تھی اب تک

مگر ہیں چشم خدائی میں رائیگاں ہم لوگ

تمام ہوش و خرد اک گمان لا حاصل

کہ سوچ سکتے تھے ورنہ کہاں کہاں ہم لوگ

ہمیں تھا زعم کے گویائے عصر ہیں لیکن

کئی دنوں سے تو جیسے ہیں بے زباں ہم لوگ

وہ سرفروشی کے جذبے بھی راکھ ہو گئے ہیں

ہتھیلیوں پہ لئے گھومتے تھے جاں ہم لوگ

مگر یہ وقت بھی انجمؔ گزر ہی جائے گا

پلٹ کے آئیں گے اک روز کامراں ہم لوگ