ہوئی بخشش تو نیا چاند چڑھایا ہم نے

ہوئی بخشش تو نیا چاند چڑھایا ہم نے

خلد میں غیر کی حوروں کو پھنسایا ہم نے

حال دل ان کو اگر جا کے سنایا ہم نے

الٹا برہم ہوئے کیوں دل کو لگایا ہم نے

کیوں بنایا تھا ہمیں ایک طرف ہے یہ سوال

اک طرف ہے یہ بھرم تم کو بنایا ہم نے

حشر کچھ آپ کی محفل نہیں بندہ پرور

جو بگڑ کر ہمیں کہتے ہیں بلایا ہم نے

وصل میں بات تھی دس بوسوں کی لیکن اس نے

شرم میں اک ہی لیا اور بقایا ہم نے

حسن آنکھوں میں اتر آیا ہے ہر چند اس کا

آئنے میں بھی جو دیکھا اسے پایا ہم نے

جب پڑھی حضرت حارثؔ کی غزل فرمایا

بخدا ایسا سخنور نہیں پایا ہم نے