hui hai zindagani dasht-e-ghurbat mein basar meri

huī hai zindagānī dasht-e-ġhurbat meñ basar merī

vatan meñ jab na pahuñchā maiñ to kyā pahuñche ḳhabar merī

taḌaptā huuñ to ho jaatī hai zālim ko ḳhabar merī

banī jaatī hai ḳhud āh-e-rasā paiġhāmbar merī

batā.e detī hai kaifiyyat-e-dard-e-jigar un ko

sitam hai mil ga.ī un kī nigāhoñ se nazar merī

tire insāf ke sadqe tirī taqsīm ke qurbāñ

shab-e-ishrat kī shaam un kī shab-e-ġham kī sahar merī

vatan meñ us se āñkheñ pher luuñ ye ho nahīñ saktā

rahī hai be-kasī ġhurbat meñ barsoñ ham-safar merī

javāb-e-nāma to laayā magar hairat hai de kis ko

ki sūrat hī nahīñ pahchāntā hai nāma-bar merī

chhupā.ūñ laakh lekin pyaar kī sūrat nahīñ chhuptī

jo haiñ ahl-e-nazar pahchān lete haiñ nazar merī

na vo aa.e na maut aa.ī na jiitā huuñ na martā huuñ

ye aalam hai mujhe bhī ab nahīñ 'safdar' ḳhabar merī

hui hai zindagani dasht-e-ghurbat mein basar meri

watan mein jab na pahuncha main to kya pahunche KHabar meri

taDapta hun to ho jati hai zalim ko KHabar meri

bani jati hai KHud aah-e-rasa paighambar meri

batae deti hai kaifiyyat-e-dard-e-jigar un ko

sitam hai mil gai un ki nigahon se nazar meri

tere insaf ke sadqe teri taqsim ke qurban

shab-e-ishrat ki sham un ki shab-e-gham ki sahar meri

watan mein us se aankhen pher lun ye ho nahin sakta

rahi hai be-kasi ghurbat mein barson ham-safar meri

jawab-e-nama to laya magar hairat hai de kis ko

ki surat hi nahin pahchanta hai nama-bar meri

chhupaun lakh lekin pyar ki surat nahin chhupti

jo hain ahl-e-nazar pahchan lete hain nazar meri

na wo aae na maut aai na jita hun na marta hun

ye aalam hai mujhe bhi ab nahin 'safdar' KHabar meri