hui jab shama raushan bazm mein parwane jag uTThe

huī jab sham.a raushan bazm meñ parvāne jaag uTThe

junūñ ne is tarah añgḌā.ī lī dīvāne jaag uTThe

ba-faiz-e-chashm-e-sāqī bazm meñ paimāne jaag uTThe

idhar gardish meñ jaam aa.e idhar maiḳhāne jaag uTThe

ye kis jān-e-bahārāñ ne ba-andāz-e-karam dekhā

muqaddar khul ga.e sahrāoñ ke vīrāne jaag uTThe

ḳhudā ma.alūm kyā tāsīr thī rindoñ kī aamad meñ

qadam rakkhā idhar aur us taraf maiḳhāne jaag uTThe

kisī ko to navā-e-dard sun kar jāgnā hī thā

agar apne nahīñ jaage to kyā begāne jaag uTThe

mo.azzin kī sadā-e-dil-nashīñ kā ye asar dekhā

haram vāloñ kī āñkheñ khul ga.iiñ but-ḳhāne jaag uTThe

ye kis ne zikr chheḌā us sarāpā-nāz kā 'jauhar'

ki husn-o-ishq ke so.e hue afsāne jaag uTThe

hui jab shama raushan bazm mein parwane jag uTThe

junun ne is tarah angDai li diwane jag uTThe

ba-faiz-e-chashm-e-saqi bazm mein paimane jag uTThe

idhar gardish mein jam aae idhar maiKHane jag uTThe

ye kis jaan-e-bahaaran ne ba-andaz-e-karam dekha

muqaddar khul gae sahraon ke virane jag uTThe

KHuda malum kya tasir thi rindon ki aamad mein

qadam rakkha idhar aur us taraf maiKHane jag uTThe

kisi ko to nawa-e-dard sun kar jagna hi tha

agar apne nahin jage to kya begane jag uTThe

moazzin ki sada-e-dil-nashin ka ye asar dekha

haram walon ki aankhen khul gain but-KHane jag uTThe

ye kis ne zikr chheDa us sarapa-naz ka 'jauhar'

ki husn-o-ishq ke soe hue afsane jag uTThe