hui na aks-e-ruKH-e-dard se najat meri

huī na aks-e-ruḳh-e-dard se najāt mirī

badal chukī hai ka.ī aa.ine hayāt mirī

khule the hoñT ki vo paas se guzar bhī gayā

bikhar ke rah ga.ī mauj-e-havā meñ baat mirī

kabhī sukūt kabhī qahqahe kabhī aañsū

badaltī rahtī hai har lamha kā.enāt mirī

chalo ġhamoñ kī kitābeñ supurd-e-āb kareñ

vo kah rahā hai kahānī hai be-sabāt mirī

sulag rahī hai tire jism kī mahak har-sū

badal ga.ī hai tire pairahan se raat mirī

laraz rahā thā talātum meñ zard sā patta

likhī huī thī samundar pe vārdāt mirī

na dab sakī kahīñ 'rāshid' mire lahū kī sadā

har ik hujūm meñ tanhā rahī hai zaat mirī

hui na aks-e-ruKH-e-dard se najat meri

badal chuki hai kai aaine hayat meri

khule the honT ki wo pas se guzar bhi gaya

bikhar ke rah gai mauj-e-hawa mein baat meri

kabhi sukut kabhi qahqahe kabhi aansu

badalti rahti hai har lamha kaenat meri

chalo ghamon ki kitaben supurd-e-ab karen

wo kah raha hai kahani hai be-sabaat meri

sulag rahi hai tere jism ki mahak har-su

badal gai hai tere pairahan se raat meri

laraz raha tha talatum mein zard sa patta

likhi hui thi samundar pe wardat meri

na dab saki kahin 'rashid' mere lahu ki sada

har ek hujum mein tanha rahi hai zat meri