hui tasir aah-o-zari ki

huī tāsīr āh-o-zārī kī

rah ga.ī baat be-qarārī kī

shikva-e-dushmani kareñ kis se

vaañ shikāyat hai dost-dārī kī

mubtalā-e-shab-e-firāq hue

zid se ham tīra-rozgārī kī

yaad aa.ī jo garm-joshī-e-yār

dīda-e-tar ne shola-bārī kī

kyuuñ na Dar jā.ūñ dekh kar vo zulf

hai shab-e-hijr kī sī tārīkī

yaas dekho ki ġhair se kah dī

baat apnī umīd-vārī kī

bas ki hai yaar kī kamar kā ḳhayāl

sher kī sūjhtī hai bārīkī

kar de roz-e-jazā shab-e-dījūr

zulmat apnī siyāhkārī kī

tere abrū kī yaad meñ ham ne

nāḳhun-e-ġham se dil-figārī kī

qatl-e-dushman kā hai irāda use

ye sazā apnī jāñ-nisārī kī

kyā musalmāñ hue ki ai 'momin'

hāsil us but se sharmsārī kī

hui tasir aah-o-zari ki

rah gai baat be-qarari ki

shikwa-e-dushmani karen kis se

wan shikayat hai dost-dari ki

mubtala-e-shab-e-firaq hue

zid se hum tira-rozgari ki

yaad aai jo garm-joshi-e-yar

dida-e-tar ne shola-bari ki

kyun na Dar jaun dekh kar wo zulf

hai shab-e-hijr ki si tariki

yas dekho ki ghair se kah di

baat apni umid-wari ki

bas ki hai yar ki kamar ka KHayal

sher ki sujhti hai bariki

kar de roz-e-jaza shab-e-dijur

zulmat apni siyahkari ki

tere abru ki yaad mein hum ne

naKHun-e-gham se dil-figari ki

qatl-e-dushman ka hai irada use

ye saza apni jaan-nisari ki

kya musalman hue ki ai 'momin'

hasil us but se sharmsari ki