hujum-e-aish-o-tarab mein bhi hai bashar tanha

hujūm-e-aish-o-tarab meñ bhī hai bashar tanhā

nafas nafas hai muhājir nazar nazar tanhā

ye merā aks hai ā.īne meñ ki dushman hai

udaas tishna-e-sitam dīda-e-be-ḳhabr tanhā

ye qatl-gāh bhī hai bāl-pan kā āñgan bhī

bhaTak rahī hai jahāñ chashm-e-mo'atabar tanhā

burā na maan mire ham-safar ḳhudā ke liye

chalūñgā maiñ bhī isī raah par magar tanhā

na jaane bhīgī haiñ palkeñ ye kyuuñ dam-e-ruḳhsat

ki ghar meñ bhī to rahā huuñ maiñ umr-bhar tanhā

na bazm-e-ḳhalvatiyāñ hai na hashr-e-gāh-e-avām

añdherī raat karūñ kis tarah basar tanhā

kisī ġhazal kā koī sher gungunāte chaleñ

tavīl rāheñ vafā kī haiñ aur safar tanhā

nisār kar duuñ ye palkoñ pe kāñptī yādeñ

tirā ḳhayāl jo aa.e dam-e-sahar tanhā

jidhar bhī jaao koī raah rok letā hai

vafā ne chhoḌī nahīñ ek bhī Dagar tanhā

barat lo yaaro baratne kī chiiz hai ye hayāt

ho laakh tarsī huī talḳh-e-muḳhtasar tanhā

umiid kitnī hī māyūsiyoñ kī mash.al hai

ho rahguzār meñ jaise koī shajar tanhā

jidhar se guzre the ma.asūm hasratoñ ke julūs

sunā ki aaj hai 'zaidī' vahī Dagar tanhā

hujum-e-aish-o-tarab mein bhi hai bashar tanha

nafas nafas hai muhajir nazar nazar tanha

ye mera aks hai aaine mein ki dushman hai

udas tishna-e-sitam dida-e-be-KHabr tanha

ye qatl-gah bhi hai baal-pan ka aangan bhi

bhaTak rahi hai jahan chashm-e-mo'atabar tanha

bura na man mere ham-safar KHuda ke liye

chalunga main bhi isi rah par magar tanha

na jaane bhigi hain palken ye kyun dam-e-ruKHsat

ki ghar mein bhi to raha hun main umr-bhar tanha

na bazm-e-KHalwatiyan hai na hashr-e-gah-e-awam

andheri raat karun kis tarah basar tanha

kisi ghazal ka koi sher gungunate chalen

tawil rahen wafa ki hain aur safar tanha

nisar kar dun ye palkon pe kanpti yaaden

tera KHayal jo aae dam-e-sahar tanha

jidhar bhi jao koi rah rok leta hai

wafa ne chhoDi nahin ek bhi Dagar tanha

barat lo yaro baratne ki chiz hai ye hayat

ho lakh tarsi hui talKH-e-muKHtasar tanha

umid kitni hi mayusiyon ki mashal hai

ho rahguzar mein jaise koi shajar tanha

jidhar se guzre the masum hasraton ke julus

suna ki aaj hai 'zaidi' wahi Dagar tanha