hujum-e-gham mein agar muskura sako to chalo

hujūm-e-ġham meñ agar muskurā sako to chalo

ki zulmatoñ meñ kiran ban ke aa sako to chalo

jahāñ se sheva-e-bātil miTā sako to chalo

ye azm le ke mire saath aa sako to chalo

ik inqalāb ḳhayāloñ meñ lā sako to chalo

ki so rahā hai zamāna jagā sako to chalo

shu.ūr-e-fikr-o-nazar ko buland karnā hai

jo laġhzishoñ ko sahārā banā sako to chalo

uTheñge raah meñ dār-o-rasan ke hangāme

vafā-parastoñ kī himmat baḌhā sako to chalo

ba-rang-e-nāla jo dil meñ to hai zabāñ pe nahīñ

vahī tarāna sar-e-dār gā sako to chalo

hai 'zabt' 'aam hamārī ye dāvat-e-mashrūt

agar zamīr ko apne jagā sako to chalo

hujum-e-gham mein agar muskura sako to chalo

ki zulmaton mein kiran ban ke aa sako to chalo

jahan se shewa-e-baatil miTa sako to chalo

ye azm le ke mere sath aa sako to chalo

ek inqalab KHayalon mein la sako to chalo

ki so raha hai zamana jaga sako to chalo

shuur-e-fikr-o-nazar ko buland karna hai

jo laghzishon ko sahaara bana sako to chalo

uThenge rah mein dar-o-rasan ke hangame

wafa-paraston ki himmat baDha sako to chalo

ba-rang-e-nala jo dil mein to hai zaban pe nahin

wahi tarana sar-e-dar ga sako to chalo

hai 'zabt' 'am hamari ye dawat-e-mashrut

agar zamir ko apne jaga sako to chalo