hujum-e-gham mein bhi hoti hai jab chubhan tanha

hujūm-e-ġham meñ bhī hotī hai jab chubhan tanhā

jabīn-e-shauq pe aatī hai phir shikan tanhā

bahār aate hī phir qissa-e-gul-o-bulbul

ḳhizāñ kā jaur uThātā rahā chaman tanhā

fasāne jur.at-o-himmat ke haiñ bahut lekin

jahān-e-'ishq meñ farhād kohkan tanhā

usī ke nuur se zulmat-kade munavvar haiñ

jo ban ke jaltā rahā sham'-e-anjuman tanhā

ḳhudā kī zaat to sab par hai mehrbāñ lekin

butoñ kā aaj bhī vāris hai barhaman tanhā

ḳhulūs-o-mehr-o-muravvat bahut zarūrī hai

badal na pā.egā zehnoñ ko husn-e-zan tanhā

har ek daur meñ rahtā hai hukmarāñ 'bismil'

ḳhayāl-o-ḳhvāb kī duniyā meñ fikr-o-fan tanhā

hujum-e-gham mein bhi hoti hai jab chubhan tanha

jabin-e-shauq pe aati hai phir shikan tanha

bahaar aate hi phir qissa-e-gul-o-bulbul

KHizan ka jaur uThata raha chaman tanha

fasane jurat-o-himmat ke hain bahut lekin

jahan-e-'ishq mein farhad kohkan tanha

usi ke nur se zulmat-kade munawwar hain

jo ban ke jalta raha sham'-e-anjuman tanha

KHuda ki zat to sab par hai mehrban lekin

buton ka aaj bhi waris hai barhaman tanha

KHulus-o-mehr-o-murawwat bahut zaruri hai

badal na paega zehnon ko husn-e-zan tanha

har ek daur mein rahta hai hukmaran 'bismil'

KHayal-o-KHwab ki duniya mein fikr-o-fan tanha