ہجوم ہم نفساں چارۂ الم نہ ہوا

ہجوم ہم نفساں چارۂ الم نہ ہوا

کہ اس طرح غم تنہا روی تو کم نہ ہوا

نہ پوچھ دشت طلب میں متاع دامن زیست

یہ تار تار تو ہوتا رہا پہ نم نہ ہوا

لکھی گئی ہیں جنوں کی حکایتیں کیا کیا

مگر وہ قصۂ غم جو کبھی رقم نہ ہوا

ملی نہ آبلہ پایان شوق کو منزل

کہ فاصلوں کی طرح حوصلہ بھی کم نہ ہوا

رہ طلب میں ہے آسودہ حال موج بہ جسم

خدا خدا ہی رہا اور صنم صنم نہ ہوا

وہ کون ہیں کہ ہوس راس آ گئی ہے جنہیں

یہاں تو عشق بھی چارہ گر الم نہ ہوا

گماں ہوا مجھے احسان‌ نا شناسی کا

جو خود بخود کوئی آمادۂ ستم نہ ہوا