hukumat zehn-o-dil pe jab se qaem hai andheron ki

hukūmat zehn-o-dil pe jab se qaa.em hai añdheroñ kī

uḌāneñ bhuul baiThī haiñ na.ī nasleñ parindoñ kī

na talḳhī hī kabhī hogī na phir takrār lafzoñ kī

agar buniyād mustahkam rakhī jā.egī rishtoñ kī

musāfir ko faqat ehsās-e-ḳhush-fahmī dilātī haiñ

saḌak par bhāgtī parchhā.iyāñ aksar daraḳhtoñ kī

ye bāzār-e-siyāsat hai yahāñ har ek manDī meñ

tijārat aam hotī jā rahī hai khoTe sikkoñ kī

tumhīñ se pūchhnā hai aaj ham ko hazrat-e-vā.iz

uḌāoge kahāñ tak dhajjiyāñ āḳhir usūloñ kī

tirī chaukhaT pe le kar aa.e haiñ ashkoñ kā nazrāna

ḳhudāyā laaj rakh le ab to in maġhmūm bandoñ kī

'sahar' meñ kis tarah mānūñ mohazzab ho ga.ī duniyā

uchhālī jā rahī hai aaj bhī pagḌī ġharīboñ kī

hukumat zehn-o-dil pe jab se qaem hai andheron ki

uDanen bhul baiThi hain nai naslen parindon ki

na talKHi hi kabhi hogi na phir takrar lafzon ki

agar buniyaad mustahkam rakhi jaegi rishton ki

musafir ko faqat ehsas-e-KHush-fahmi dilati hain

saDak par bhagti parchhaiyan aksar daraKHton ki

ye bazar-e-siyasat hai yahan har ek manDi mein

tijarat aam hoti ja rahi hai khoTe sikkon ki

tumhin se puchhna hai aaj hum ko hazrat-e-waiz

uDaoge kahan tak dhajjiyan aaKHir usulon ki

teri chaukhaT pe le kar aae hain ashkon ka nazrana

KHudaya laj rakh le ab to in maghmum bandon ki

'sahar' mein kis tarah manun mohazzab ho gai duniya

uchhaali ja rahi hai aaj bhi pagDi gharibon ki