humakti konpalon ko KHushk ghas kar degi

humaktī koñpaloñ ko ḳhushk ghaas kar degī

havā daraḳhtoñ ko phir be-libās kar degī

shagufta phuul haiñ mahfūz rakkho mausam se

ye saḳht dhuup to phūloñ kā naas kar degī

sulagte chāñd sā maiñ tere saath saath rahā

safar kī shaam tujhe bhī udaas kar degī

isī sabab to maiñ dasht-e-balā meñ chup chup thā

ye āp-bītī tumheñ bad-havās kar degī

nazar meñ uḌtī rahī yuuñ hī gard-e-gumrāhī

to jism-o-jāñ ko baham nā-shanās kar degī

utar hī ā.ūñgā ik din ḳhalā ke maskan se

havā ko qaid ye miTTī kī baas kar degī

humakti konpalon ko KHushk ghas kar degi

hawa daraKHton ko phir be-libas kar degi

shagufta phul hain mahfuz rakkho mausam se

ye saKHt dhup to phulon ka nas kar degi

sulagte chand sa main tere sath sath raha

safar ki sham tujhe bhi udas kar degi

isi sabab to main dasht-e-bala mein chup chup tha

ye aap-biti tumhein bad-hawas kar degi

nazar mein uDti rahi yun hi gard-e-gumrahi

to jism-o-jaan ko baham na-shanas kar degi

utar hi aaunga ek din KHala ke maskan se

hawa ko qaid ye miTTi ki bas kar degi