hurmat-e-zindagi nahin jati

hurmat-e-zindagī nahīñ jaatī

ḳhud-kushī ham se kī nahīñ jaatī

taḳhta-e-mashq ban rahe haiñ log

vaqt kī barhamī nahīñ jaatī

kyoñ na ham tark-e-mai-kashī karte

muñh lagī mai-kashī nahīñ jaatī

apnā ātish-kada hai aur maiñ huuñ

ġhair tak sho.alagī nahīñ jaatī

roz marte haiñ roz jiite haiñ

apnī shā.istagī nahīñ jaatī

kyā ajūba hai jaan jā kar bhī

aañkh kī raushnī nahīñ jaatī

jaane kis maslahat ke maare haiñ

lab-kushā.ī bhī kī nahīñ jaatī

har jatan ham ne kar ke dekh liyā

jiite jī tishnagī nahīñ jaatī

ḳhud ko 'hāmid' na sharmsār karo

āp-bītī kahī nahīñ jaatī

hurmat-e-zindagi nahin jati

KHud-kushi hum se ki nahin jati

taKHta-e-mashq ban rahe hain log

waqt ki barhami nahin jati

kyon na hum tark-e-mai-kashi karte

munh lagi mai-kashi nahin jati

apna aatish-kada hai aur main hun

ghair tak shoalagi nahin jati

roz marte hain roz jite hain

apni shaistagi nahin jati

kya ajuba hai jaan ja kar bhi

aankh ki raushni nahin jati

jaane kis maslahat ke mare hain

lab-kushai bhi ki nahin jati

har jatan hum ne kar ke dekh liya

jite ji tishnagi nahin jati

KHud ko 'hamid' na sharmsar karo

aap-biti kahi nahin jati