ہشیاریٔ جنوں کو ہے ساماں سے احتراز

ہشیاریٔ جنوں کو ہے ساماں سے احتراز

داماں سے احتراز گریباں سے احتراز

دل کو مرے ہے درد فراواں سے احتراز

یہ اس لئے کہ ہے اسے درماں سے احتراز

ہے رعب حسن پر یہ بھروسہ اسے کہ ہے

درباں سے احتراز نگہباں سے احتراز

وہ رشک صد بہار تصور میں ہے مرے

مجھ کو بجا ہے سیر گلستاں سے احتراز

ہے گرمیٔ بیان محبت پہ اب حیات

کرنا پڑا ہے صحبت خوباں سے احتراز

حاصل کہیں نہ عشق کا بن جائے خود ہی عشق

اس خوف سے ہے الفت خوباں سے احتراز

بیدلؔ نے اپنا حال جو شعروں میں کہہ دیا

کرنے لگا ہے اب وہ غزل خواں سے احتراز