hushyari-e-junun ko hai saman se ehtiraaz

hushyārī-e-junūñ ko hai sāmāñ se ehtirāz

dāmāñ se ehtirāz garebāñ se ehtirāz

dil ko mire hai dard-e-farāvāñ se ehtirāz

ye is liye ki hai use darmāñ se ehtirāz

hai ro.ab-e-husn par ye bharosa use ki hai

darbāñ se ehtirāz nigahbāñ se ehtirāz

vo rashk-e-sad-bahār tasavvur meñ hai mire

mujh ko bajā hai sair-e-gulistāñ se ehtirāz

hai garmī-e-bayān-e-mohabbat pe ab hayāt

karnā paḌā hai sohbat-e-ḳhūbāñ se ehtirāz

hāsil kahīñ na ishq kā ban jaa.e ḳhud hī ishq

is ḳhauf se hai ulfat-e-ḳhūbāñ se ehtirāz

'bedil' ne apnā haal jo sheroñ meñ kah diyā

karne lagā hai ab vo ġhazal-ḳhvāñ se ehtirāz

hushyari-e-junun ko hai saman se ehtiraaz

daman se ehtiraaz gareban se ehtiraaz

dil ko mere hai dard-e-farawan se ehtiraaz

ye is liye ki hai use darman se ehtiraaz

hai roab-e-husn par ye bharosa use ki hai

darban se ehtiraaz nigahban se ehtiraaz

wo rashk-e-sad-bahaar tasawwur mein hai mere

mujh ko baja hai sair-e-gulistan se ehtiraaz

hai garmi-e-bayan-e-mohabbat pe ab hayat

karna paDa hai sohbat-e-KHuban se ehtiraaz

hasil kahin na ishq ka ban jae KHud hi ishq

is KHauf se hai ulfat-e-KHuban se ehtiraaz

'bedil' ne apna haal jo sheron mein kah diya

karne laga hai ab wo ghazal-KHwan se ehtiraaz