husn badnam hua ishq ke afsanon se

husn badnām huā ishq ke afsānoñ se

ek fitna hai jo uTThā ka.ī unvānoñ se

dil hai māmūr tirī yaad se armānoñ se

na rahā ghar mirā ḳhālī kabhī mehmānoñ se

dil shagufta na ho kyoñ aaj bayābānoñ se

ġham-e-gītī kī hai raunaq inhī vīrānoñ se

ḳhabar-e-fasl-e-bahārī ne qayāmat Dhā dī

shor-e-fariyād uThā kitne hī zindānoñ se

ham ne sīkhā nahīñ sāhil pe bharosa karnā

baḌh ke tūfān hue bhiḌ ga.e tūfānoñ se

kis tarah ālam-e-asbāb ko Thukrāte haiñ

pūchhiye jā ke kabhī be-sar-o-sāmānoñ se

jaan denā to gavārā hai magar ai shab-e-ġham

mujh ko allāh bachā.e tire ehsānoñ se

kashtī apnī kabhī sharminda-e-sāhil na huī

umr saarī ye ulajhte rahī tūfānoñ se

aise logoñ se rakhūñ ḳhaak tavaqqo maiñ 'qadīr'

kaam paḌtā hai to ho jaate haiñ an-jānoñ se

husn badnam hua ishq ke afsanon se

ek fitna hai jo uTTha kai unwanon se

dil hai mamur teri yaad se armanon se

na raha ghar mera KHali kabhi mehmanon se

dil shagufta na ho kyon aaj bayabanon se

gham-e-giti ki hai raunaq inhi viranon se

KHabar-e-fasl-e-bahaari ne qayamat Dha di

shor-e-fariyaad uTha kitne hi zindanon se

hum ne sikha nahin sahil pe bharosa karna

baDh ke tufan hue bhiD gae tufanon se

kis tarah aalam-e-asbab ko Thukraate hain

puchhiye ja ke kabhi be-sar-o-samanon se

jaan dena to gawara hai magar ai shab-e-gham

mujh ko allah bachae tere ehsanon se

kashti apni kabhi sharminda-e-sahil na hui

umr sari ye ulajhte rahi tufanon se

aise logon se rakhun KHak tawaqqo main 'qadir'

kaam paDta hai to ho jate hain an-jaanon se