husn bajae KHud parda hai is parde ko uThae kaun

husn bajā.e ḳhud parda hai is parde ko uThā.e kaun

dekh nahīñ saktī aañkh us ko badle apnī raa.e kaun

haath nashe kā āñkhoñ par hai ab ye haath haTā.e kaun

saaqī ke zaanū par sar hai hosh meñ aa.e to aa.e kaun

shahr-e-husn kā rahne vaalā laqab hai mujh pardesī kā

mere ishq ko ḳhuddārī ko apne paas biThā.e kaun

rāh-guzar kī garmī to bārish se kam ho jā.egī

siine meñ jo aag lagī hai is par qaabū paa.e kaun

ḳhaak meñ mil gayā ḳhuun hamārā us ne patthar maarā to

zaḳhm bhī us kā diyā huā dhan hai is dhan ko Thukrā.e kaun

aañkh se aañkh milāne se bhī jo katrā.e dost nahīñ

aate jaate in lamhoñ ko apne ghar Thahrā.e kaun

jism ko jalā kar 'vājid' apnā raushniyoñ meñ rahte haiñ

TuuTī phūTī dīvāroñ par rakkhe apne saa.e kaun

husn bajae KHud parda hai is parde ko uThae kaun

dekh nahin sakti aankh us ko badle apni rae kaun

hath nashe ka aankhon par hai ab ye hath haTae kaun

saqi ke zanu par sar hai hosh mein aae to aae kaun

shahr-e-husn ka rahne wala laqab hai mujh pardesi ka

mere ishq ko KHuddari ko apne pas biThae kaun

rah-guzar ki garmi to barish se kam ho jaegi

sine mein jo aag lagi hai is par qabu pae kaun

KHak mein mil gaya KHun hamara us ne patthar mara to

zaKHm bhi us ka diya hua dhan hai is dhan ko Thukrae kaun

aankh se aankh milane se bhi jo katrae dost nahin

aate jate in lamhon ko apne ghar Thahrae kaun

jism ko jala kar 'wajid' apna raushniyon mein rahte hain

TuTi phuTi diwaron par rakkhe apne sae kaun