husn bhi hai panah mein ishq bhi hai panah mein

husn bhī hai panāh meñ ishq bhī hai panāh meñ

ik tirī nigāh meñ ik mirī nigāh meñ

khel nahīñ hañsī nahīñ haal merā sun na sun

dard hai do jahān kā ishq kī ek aah meñ

ḳhūgar-e-zulm-o-jaur ko shikva-e-iltifāt hai

qalb se uTh ke chhā ga.ī ġham kī ghaTā nigāh meñ

tā-ba-hadd-e-dīd hai ek sirāt-e-mustaqīm

hājat-e-rāhbar nahīñ ishq kī shāhrāh meñ

dast-e-karam baḌhā diyā us ne bilā lihāz-e-jurm

qābil-e-raham kuchh na thā varna mire gunāh meñ

kuchh mirī be-qarāriyāñ kuchh mirī nā-tavāniyāñ

kuchh tirī rahmatoñ kā hai haath mire gunāh meñ

lāla-o-gul kī mahfileñ apnī jagah pe kuchh na thī

jām-e-bahār ban ga.e khiñch ke mirī nigāh meñ

husn bhi hai panah mein ishq bhi hai panah mein

ek teri nigah mein ek meri nigah mein

khel nahin hansi nahin haal mera sun na sun

dard hai do jahan ka ishq ki ek aah mein

KHugar-e-zulm-o-jaur ko shikwa-e-iltifat hai

qalb se uTh ke chha gai gham ki ghaTa nigah mein

ta-ba-hadd-e-did hai ek siraat-e-mustaqim

hajat-e-rahbar nahin ishq ki shahrah mein

dast-e-karam baDha diya us ne bila lihaz-e-jurm

qabil-e-raham kuchh na tha warna mere gunah mein

kuchh meri be-qarariyan kuchh meri na-tawaniyan

kuchh teri rahmaton ka hai hath mere gunah mein

lala-o-gul ki mahfilen apni jagah pe kuchh na thi

jam-e-bahaar ban gae khinch ke meri nigah mein