husn-e-asnam ba-har-lamha fuzun hai ki nahin

husn-e-asnām ba-har-lamha fuzūñ hai ki nahīñ

ye mire zauq-e-tamāshā kā fusūñ hai ki nahīñ

kuchh to irshād ho ai tamkinat-e-ān-e-jamāl

ishq shā.ista-e-tahzīb-e-junūñ hai ki nahīñ

ye jahān-e-mai-o-mīnā-o-subū ai vaa.iz

partav-e-nargis-e-mastāna hai kyuuñ hai ki nahīñ

shola-e-sham.a se ḳhākistar-e-parvāna tak

ek hī silsila-e-soz-e-darūñ hai ki nahīñ

halqa-e-bād-e-sabā tazkira-e-zulf-e-sanam

is meñ kuchh shā.eba-e-zauq-e-junūñ hai ki nahīñ

baste jaate haiñ nagar dil haiñ tabāh o vīrāñ

āgahī dushman-e-duniyā-e-sukūñ hai ki nahīñ

ham vo haiñ aaj 'ravish'-e-sāhib-e-dīvān-e-ġhazal

ye sab us chashm-e-suḳhan-go kā fusūñ hai ki nahīñ

husn-e-asnam ba-har-lamha fuzun hai ki nahin

ye mere zauq-e-tamasha ka fusun hai ki nahin

kuchh to irshad ho ai tamkinat-e-an-e-jamal

ishq shaista-e-tahzib-e-junun hai ki nahin

ye jahan-e-mai-o-mina-o-subu ai waiz

partaw-e-nargis-e-mastana hai kyun hai ki nahin

shola-e-shama se KHakistar-e-parwana tak

ek hi silsila-e-soz-e-darun hai ki nahin

halqa-e-baad-e-saba tazkira-e-zulf-e-sanam

is mein kuchh shaeba-e-zauq-e-junun hai ki nahin

baste jate hain nagar dil hain tabah o viran

aagahi dushman-e-duniya-e-sukun hai ki nahin

hum wo hain aaj 'rawish'-e-sahib-e-diwan-e-ghazal

ye sab us chashm-e-suKHan-go ka fusun hai ki nahin