husn-e-be-parwa ne jab chaha huwaida ho gaya

husn-e-be-parvā ne jab chāhā huvaidā ho gayā

aur jab chāhā zamāne-bhar se pardā ho gayā

toḌne paḌte haiñ sab rishte pa.e irfān-e-fan

jo savād-e-shauq meñ aayā vo tanhā ho gayā

thī ye ḳhush-fahmī ki hai pāyāb dariyā fikr kā

is meñ utre the ki paanī sar se ūñchā ho gayā

pur-asar niklī karishma-sāzī husn-e-talab

kal talak jo ġhair thā vo aaj apnā ho gayā

dard-e-tanhā.ī se sote-jāgte kaaTī thī raat

sub.h ne marham rakhā aisā gavārā ho gayā

kyā kaheñ us ko ba-juz sar-gashta-e-fahm-o-ḳhirad

jis ko dīvāna kahā duniyā ne daanā ho gayā

nāla-e-shab-gīr thā be-kaif 'rāhī' is qadar

us ke sannāToñ se saarā shahr suunā ho gayā

husn-e-be-parwa ne jab chaha huwaida ho gaya

aur jab chaha zamane-bhar se parda ho gaya

toDne paDte hain sab rishte pae irfan-e-fan

jo sawad-e-shauq mein aaya wo tanha ho gaya

thi ye KHush-fahmi ki hai payab dariya fikr ka

is mein utre the ki pani sar se uncha ho gaya

pur-asar nikli karishma-sazi husn-e-talab

kal talak jo ghair tha wo aaj apna ho gaya

dard-e-tanhai se sote-jagte kaTi thi raat

subh ne marham rakha aisa gawara ho gaya

kya kahen us ko ba-juz sar-gashta-e-fahm-o-KHirad

jis ko diwana kaha duniya ne dana ho gaya

nala-e-shab-gir tha be-kaif 'rahi' is qadar

us ke sannaTon se sara shahr suna ho gaya