husn-e-fitrat ke amin qatil-e-kirdar na ban

husn-e-fitrat ke amiiñ qātil-e-kirdār na ban

shohrat-e-ġham ke liye raunaq-e-bāzār na ban

tārik-e-rasm-e-vafā aur gunahgār na ban

mahram-e-ishq hai to mahram-e-asrār na ban

apnī gardan pe machaltī huī talvār na ban

nañg-e-īmāñ hī sahī sūrat-e-inkār na ban

bad-gumānī ko mirī aur baḌhā detā hai

un kā ye kahnā ki dāman-kash-e-aġhyār na ban

rahrav-e-manzil-e-hastī huuñ maiñ ai yād-e-habīb

dhuup meñ mere liye sāya-e-dīvār na ban

dil ko takmīl-e-tamannā kā ishāra de kar

mujh se tū merī tamannā kā ḳharīdār na ban

terī manzil hai ġhubār-e-rah-arbāb-e-vafā

rahrav-e-rāh-e-talab qāfila-sālār na ban

jin ke dāman meñ tamannā ko sukūñ miltā hai

un kī nazroñ se mohabbat kā talabgār na ban

vo tirī mast-nigāhī kā uḌā leñge mazāq

ahl-e-dānish meñ kabhī bhuul ke hoshiyār na ban

ho na jaa.e kahīñ masdūd tirī rāh-e-talab

ai mirī lauh-e-jabīñ sañg-e-dar-e-yār na ban

husn-e-fitrat ke amin qatil-e-kirdar na ban

shohrat-e-gham ke liye raunaq-e-bazar na ban

tarik-e-rasm-e-wafa aur gunahgar na ban

mahram-e-ishq hai to mahram-e-asrar na ban

apni gardan pe machalti hui talwar na ban

nang-e-iman hi sahi surat-e-inkar na ban

bad-gumani ko meri aur baDha deta hai

un ka ye kahna ki daman-kash-e-aghyar na ban

rahraw-e-manzil-e-hasti hun main ai yaad-e-habib

dhup mein mere liye saya-e-diwar na ban

dil ko takmil-e-tamanna ka ishaara de kar

mujh se tu meri tamanna ka KHaridar na ban

teri manzil hai ghubar-e-rah-arbab-e-wafa

rahraw-e-rah-e-talab qafila-salar na ban

jin ke daman mein tamanna ko sukun milta hai

un ki nazron se mohabbat ka talabgar na ban

wo teri mast-nigahi ka uDa lenge mazaq

ahl-e-danish mein kabhi bhul ke hoshiyar na ban

ho na jae kahin masdud teri rah-e-talab

ai meri lauh-e-jabin sang-e-dar-e-yar na ban