husn-e-hijab-ashna jaanib-e-baam aa gaya

husn-e-hijāb-āshnā jānib-e-bām aa gayā

bāda-e-tah-nashīn-e-jām tā lab-e-jām aa gayā

aap ne pheñk dī naqāb garmi-e-ishq dekh kar

hashr-navāz husn aaj hashr ke kaam aa gayā

millat-e-kufr-o-dīñ kī bahas garm thī ḳhānqāh meñ

itne meñ koī mai piye dast-ba-jām aa gayā

shauq kā e'tibār kyā yaas ye iḳhtiyār kyā

rāh-e-ummīd-o-bīm meñ dil kā maqām aa gayā

dil mirā dekhtā rahā aur merī zabān par

lazzat-e-jān-e-ārzū aap kā naam aa gayā

dahr javān ho gayā khul gayā mai-kade kā dar

sāqī-e-mast mast-e-nāz mast-e-ḳhirām aa gayā

jalva-e-be-hijāb ko ḳhuub samajh rahā huuñ maiñ

mahshar-e-dīd muntazir manzar-e-ām aa gayā

'kaifī'-e-be-qarār sun ye rag-e-jāñ ke saaz se

hai mirī iltijā qubūl dil kā payām aa gayā

husn-e-hijab-ashna jaanib-e-baam aa gaya

baada-e-tah-nashin-e-jam ta lab-e-jam aa gaya

aap ne phenk di naqab garmi-e-ishq dekh kar

hashr-nawaz husn aaj hashr ke kaam aa gaya

millat-e-kufr-o-din ki bahas garm thi KHanqah mein

itne mein koi mai piye dast-ba-jam aa gaya

shauq ka e'tibar kya yas ye iKHtiyar kya

rah-e-ummid-o-bim mein dil ka maqam aa gaya

dil mera dekhta raha aur meri zaban par

lazzat-e-jaan-e-arzu aap ka nam aa gaya

dahr jawan ho gaya khul gaya mai-kade ka dar

saqi-e-mast mast-e-naz mast-e-KHiram aa gaya

jalwa-e-be-hijab ko KHub samajh raha hun main

mahshar-e-did muntazir manzar-e-am aa gaya

'kaifi'-e-be-qarar sun ye rag-e-jaan ke saz se

hai meri iltija qubul dil ka payam aa gaya