حسن خط شعار پذیرائی لے گیا

حسن خط شعار پذیرائی لے گیا

مجھ سے مرے خلوص کی سچائی لے گیا

اک دوسرے کو زخم دکھاتا نہیں کوئی

وہ جب سے اعتبار مسیحائی لے گیا

پہلے پہل ملا تو اکیلا کیا مجھے

جب یاد بن کے آیا تو تنہائی لے گیا

جتنی خوشی تھی میں نے زمانے کو بانٹ دی

خود اپنے گھر میں غم کی شناسائی لے گیا

مجبوریوں کا اس کی کرے کون تجزیہ

جو اپنے ساتھ وقت کی رسوائی لے گیا

شب آشنا تھے لاتے کہاں تاب روشنی

سورج تمام شہر کی بینائی لے گیا

مختارؔ تاب جنبش لب بھی کہاں ہے اب

وہ کیا گیا کہ قوت گویائی لے گیا