husn-e-KHat-e-shiar pazirai le gaya

husn-e-ḳhat-e-shi'ār pazīrā.ī le gayā

mujh se mire ḳhulūs kī sachchā.ī le gayā

ik dūsre ko zaḳhm dikhātā nahīñ koī

vo jab se e'tibār-e-masīhā.ī le gayā

pahle-pahal milā to akelā kiyā mujhe

jab yaad ban ke aayā to tanhā.ī le gayā

jitnī ḳhushī thī maiñ ne zamāne ko baañT dī

ḳhud apne ghar meñ ġham kī shanāsā.ī le gayā

majbūriyoñ kā us kī kare kaun tajziya

jo apne saath vaqt kī rusvā.ī le gayā

shab-āshnā the laate kahāñ tāb-e-raushnī

sūraj tamām shahr kī bīnā.ī le gayā

'muḳhtār' tāb-e-jumbish-e-lab bhī kahāñ hai ab

vo kyā gayā ki quvvat-e-goyā.ī le gayā

husn-e-KHat-e-shi'ar pazirai le gaya

mujh se mere KHulus ki sachchai le gaya

ek dusre ko zaKHm dikhata nahin koi

wo jab se e'tibar-e-masihai le gaya

pahle-pahal mila to akela kiya mujhe

jab yaad ban ke aaya to tanhai le gaya

jitni KHushi thi main ne zamane ko banT di

KHud apne ghar mein gham ki shanasai le gaya

majburiyon ka us ki kare kaun tajziya

jo apne sath waqt ki ruswai le gaya

shab-ashna the late kahan tab-e-raushni

suraj tamam shahr ki binai le gaya

'muKHtar' tab-e-jumbish-e-lab bhi kahan hai ab

wo kya gaya ki quwwat-e-goyai le gaya